The making ကို ရေးမယ်ရေးမယ်နဲ့ အခုမှ ရေးဖြစ်ပါတော့တယ်။ ဒီကားတိုလေးကို ရိုက်မယ်လုပ်တော့ လူလိုက်စုရတာတင် တော်တော် ပင်ပန်းပါတယ်။ အသိထဲမှာ သရုပ်ဆောင် လုပ်ဖူးတဲ့လူကလည်း မရှိတော့ အပေါင်းအသင်းတွေကိုပဲ အကူအညီတောင်းပြီး သရုပ်ဆောင်ခိုင်းရပါတော့တယ်။
ဇာတ်လမ်းကတော့ မယ်မယ်ရရမရှိပါ။ Non-stop အက်ရှင်ကို ဘယ်လို ကားဆက်သွားမယ်၊ Effect တွေကို ဘယ်လိုထည့်မယ် ဆိုတာက အဓိက အချက်ပါ။ အဓိက ဇာတ်ကောင်ကို လူဆိုးတွေက ဝိုင်းပစ်၊ သူက ပြန်ပစ်၊ လူဆုံးအားလုံးသေ၊ ဆရာကြီးနဲ့တွေ့၊ တိုက်ခိုက်ကြ၊ နောက်ဆုံး ဆရာကြီးသေ။ သမားရိုးကျ ဇာတ်လမ်းပါပဲ။
ဆရာကြီးကတော့ AutoCad နဲ့ ဒီဇိုင်းလောကက ဆရာတစ်ဆူဖြစ်တဲ့ MTZO ပါ။ သူ့ဒိတ်ကို ရဖို့ နှစ်ပတ်လောက် ကြိုချိတ်ထားရတယ်။ နောက် ကျန်တဲ့ လူဆိုးတွေ လုပ်ဖို့ လိုက်အကူအညီတောင်းရသူတွေကတော့ ဂျာဂျာ၊ MMO နဲ့ စည်သူတို့ပါ။ သူတို့လည်း ခေသူတွေတော့ မဟုတ်။ ကိုယ့်နယ်ပယ်နဲ့ကိုယ် Professional တွေပါပဲ။ ခင်လွန်းလို့သာ လူကြမ်းလုပ်ပေးကြတာ။ ကင်မရာမင်းတစ်ယောက်လိုနေတာနဲ့ ဂျွန်မိုးအိမ်ကို လှမ်းအကူတောင်းထားလိုက်ပါတယ်။
ရိုက်ကွင်းနေရာကိုတော့ အိမ်အောက်ကိုပဲ ရွေးထားလိုက်တယ်။ ပစ်ခတ်၊ ရှောင်တိမ်း စတဲ့ အဆက်အစပ်တွေကို တွက်ချက်ရတာတင် တစ်နာရီလောက်ကြာတယ်။ Storyboard ရေးတာကတော့ သုံးနာရီလောက်ကြာသွားပါတယ်။
တကယ်ရိုက်မယ့် မနက်မှာ မင်းသားမင်းသမီးတွေကို လူစုံအောင်စောင့်တာ၊ မနက်စာစားတာတွေနဲ့ မနက် ၁၁ နာရီမှ စရိုက်ဖြစ်ပါတော့တယ်။ ရိုက်ပြီး ဘယ်လောက်မှ မကြာသေးခင် ဘယ်သူအတို့အထောင် လုပ်လိုက်တယ် မသိ၊ ရဲနှစ်ယောက်ပေါက်ချလာပြီး ဟိုမေးဒီမေးနဲ့ ရိုက်တာမှာသုံးတဲ့ သေနတ်တွေပါ သေချာ လိုက်စစ်ပါတော့တယ်။ စင်္ကာပူမှာ ကော်ကျည်ဆန် ထည့်ပစ်ရတဲ့ Airsoft သေနတ်တွေကို ဘန်းထားတယ်။ သေနတ်တွေက Airsoft မဟုတ်တာရယ်၊ ကျောင်းပရောဂျက်အတွက် ရိုက်နေတယ်လို့ရယ် လျှောက်ပြောလိုက်တော့မှပဲ မောင်မင်းကြီးသား နှစ်ကောင် ထွက်သွားတော့တယ်။
ကင်မရာအတွက် အထူးတလည် ရှာမနေတော့ပါ။ လက်ထဲမှာ ရှိတဲ့ အိုင်ဖုန်းဖိုးတွေနဲ့ပဲ ရိုက်လိုက်ကြတယ်။ တကယ်ရိုက်တော့ ဇာတ်လမ်းမှာ ပါတဲ့အတိုင်း လူပြည့်အောင်ရိုက်ဖို့ လိုနေတယ်။ အဲဒါနဲ့ ဂျာဂျာကို နှစ်ခါပြန် သေခိုင်းလိုက်တယ်။ ဂျွန်မိုးအိမ်ကိုလည်း ဂျာကင်တစ်ထည်ကောက်စွပ်ပေးပြီး လူဆိုးလုပ်ခိုင်းလိုက်တာ ခမျာ အတော် စိတ်ညစ်သွားရှာတယ်။ မြက်ခင်းထဲ ဖြတ်ပြေးကြတာ ခွေးချေး နင်းမိတဲ့ လူလည်းနင်းမိ။
ရိုက်ရင်းနဲ့ နေလည်းမြင့်လာသလို လူတွေလည်း နွမ်း၊ ချွေးတွေလည်းပြန်နဲ့ ကုတ်အင်္ကျီတွေအောက်မှာ အတော်နေရခက်လာပြီ။ တိုက်ခန်းတွေပေါ်က ကလေးတွေလည်း အော်ဟစ်ပြီး အားပေးကြတယ်။ ဆရာကြီးလုပ်တဲ့ MTZO က တော်ပြီဆိုပြီး ထွက်ထွက်ပြေးနေလို့ မနည်း ဖမ်းဆွဲထားရတယ်။
မွန်းလွဲနှစ်နာရီလောက်မှာတော့ ရိုက်ပြီးသွားပါတယ်။ အဲဒီနောက်မှာ Editing နဲ့ အထူးပြုလုပ်ချက်၊ အသံတွေ လိုက်ထည့်တာ နောက်တစ်ပတ်ကြာသွားတယ်။ ဒီဗီဒီယိုကို ကိုယ့်ဟာကိုယ် ပြန်ကြည့်မိတော့ ကလင့်အိစ်ဝုဒ် ရိုက်ခဲ့တဲ့ Dirty Harry ဇာတ်ကားတွေကို သတိရလို့ ပြုံးဖြီးဖြီး ဖြစ်သွားတယ်။ :P