ဘိုလီဗတ် အရှုပ်တော်ပုံ

တစ်နေ့တွင် ဝမ်းမရီနာ ဘိုလီဗတ်သို့ ဖော်မပါတစ်ကိုယ်တည်း ကင်မရာတစ်လုံး၊ ပေကြိုးတစ်ချောင်းဆွဲကာ ထွက်ခဲ့လေ၏။ အခါတိုင်းကား သူတပါးရိုက်လာပေးသော ဓာတ်ပုံ၊ အတိုင်းအတာ၊ Autocad Plan တို့ကို အခြေတည်ကာ 3D ပုံများ ဆွဲရသော်ငြား ယခုတွင် ကိုယ်စီကိုယ်စီ မအားမလပ်နိုင်အောင် ရှိကြသောကြောင့် တစ်ကိုယ်တော် ကြဲရတော့မည်။

သို့ဖြင့် ယင်းသို့ရောက်သော် လုံခြုံရေးအမျိုးသမီးကို ခွင့်တောင်းရ၏။ ယင်းကား အူကြောင်ကြောင်လုပ်နေသဖြင့် နောက်ဆုံးတွင် ကောင်တာမှ အမျိုးသမီးထံ ရောက်သွားလေ၏။

“ဓာတ်ပုံရိုက်မယ်နော်”
“အဟင်းဟင်း မောင်လေးကလည်း ဘာတွေ လာပြောနေတာလဲ”
“ဒီလော်ဘီကို ဓာတ်ပုံရိုက်မယ်လို့ ပြောတာခင်ဗျ”
မချောကား မျက်နှာတစ်ချက် တင်းသွားကာ သူ့ဘေးမှ အမျိုးသမီးနှင့် ကြိတ်ကြိတ်ကြိတ်ကြိတ် တိုင်ပင်လေ၏။ ယင်းနောက် ကျွန်ုပ်ဘက် ပြန်လှည့်လာလေသည်။

“ဓာတ်ပုံရိုက်ဖို့ ခွင့်မပြုနိုင်ပါဘူးရှင့်.. 12 ထပ်က အဆောက်အအုံထိန်းသိမ်းရေးက စာထုတ်ပေးမှ ရိုက်လို့ရမယ်”

သို့ဖြင့် ကျွန်ုပ်လည်း ၁၂ ထပ် တက်ရ၏။ အနှီပုဂ္ဂိုဟ်ကား သဘောကောင်းလှ၏။ သူအောက်ကလူတွေကို အကြောင်းကြားလိုက်မည်။ ရိုက်သာရိုက်ပါဟူ၏။ သို့နှင့် ကျွန်ုပ်လည်း အောက်ထပ် ပြန်ဆင်း၏။ ရိုက်မည်ပြု၏။ လုံခြုံရေးအမျိုးသမီးက လာတား၏။ ကောင်တာသို့ရောက်၏။ ကောင်တာမှ မချောနှင့် အခြေအတင် စကားများးကြ၏။ လုံခြုံရေးမှ လူကြီးရောက်လာ၏။ ကျွန်ုပ်က ရှင်းပြ၏။ ၁၂ ထပ်သို့ ဝေါ်ကီတော်ကီများဖြင့် လှမ်းဆက်ကြ၏။ အော်ကြ၏။ ပြောကြ၏။ အချင်းချင်းလည်း စကားများကြ၏။ နောက်ဆုံးတွင်ကား ရိုက်နိုင်ပါပြီဟူ၏။

ဤပုံကား ကျွန်ုပ်ကိုယ်တိုင် ရိုက်ကူးတိုင်းတာခဲ့သော အချက်အလက်များကို အခြေခံ၍ ဒီဇိုင်းဆွဲထားသောပုံဖြစ်လေတော့သတည်း။ :P

One Marina

360 Degree Panorama

ငွေဆောင် နဲ့ နတ်ကျောက်ပုံ ပန်နိုရားမားတွေ တင်ပြီးတဲ့နောက် သူငယ်ချင်းကောင်းများက ဤသို့ ထောပနာ ပြုကြလေကုန်သည်။

MTZO: “ဟင်… ပုံက အပြည့်လည်း မရဘူး.. ဒီမှာ ကြည့် သူများတွေ ဘယ်လိုလုပ်ထားလဲဆိုတာ..” (Google Map Street View ကိုဖွင့်လျက်)။

Sithu: “ဟွန့် 360 ဒီဂရီလည်း ဟုတ်ဘူး…” (၎င်းလေသံကား ရှော်လိုက်လေခြင်းဟူသော Tone အပြည့်အဝ ပါသတည်း။)

ထို့ကြောင့် ကျွန်ုပ်သည် ရိုးရိုးကင်မရာတစ်လုံးသည် 35mm lens သာရှိကြောင်း၊ ရေပြင်ညီ ဒီဂရီအားဖြင့် 53 ဒီကရီ မျှသာ ရှိကြောင်း၊ ထို့ကြောင့် 360 ဒီဂရီ အပြည့်အဝ ဖမ်းမိစေရန် အနည်းဆုံး ဓာတ်ပုံ ၇ ပုံ ရိုက်ရမည်ဖြစ်ကြောင်း၊ ယင်းပုံများကို ဆက်သောအခါတွင်လည်း အခက်အခဲများစွာ ရှိကြောင်း၊ ပုံများ တွန့်ခြင်း ကွေးခြင်း ဖြစ်တတ်ကြောင်း၊ မြင်ကွင်းကျယ် ကင်မရာသုံးမှသာ ပုံကောင်းကောင်းရမည်ဖြစ်ကြောင်း၊ Tripod ဒေါက်တံခံကာ ရိုက်မှသာ အသေးစိတ်မှန်ကန်သော ပုံရနိုင်မည်ဖြစ်ကြောင်းတို့ကို အာပေါင်အာရင်းသန်သန်ဖြင့် နာရီဝက်မျှ အချိန်ကုန်ခံကာ ရှင်းပြပါသော်လည်း ခေါင်းတခါခါ လည်တခါခါနှင့် ညံတာက ညံ့တာပါပဲကွာ ဟု အမူအရာဆောင်သော လက္ခဏာများကို ပြကြလေ၏။

နောက်ဆုံးတွင် မခံမရပ်နိုင်သော ကျွန်ုပ်မှာ အပြင်ကင်မရာနှင့် ရိုက်မရလျှင် ရှိစေတော့၊ 3D ကင်မရာနှင့် ရိုက်တော့အံ့ ဟု ကြုံးဝါးကာ အင်္ကျီလက်ကို ပင့်လျက် ယခင်ဖိုင်အဟောင်း အချို့ကို Panorama Utility ဖြင့် အားကြိုးမာန်တက် Render လုပ်လိုက်ရာတွင်မှ အနှီ ပုဂ္ဂိုဟ်အကောင်းစားလေးတို့ကား ပါးစပ်အဟောင်းသား ရှိကြလေကုန်တော့သတည်း။
:D :D

Dining Diversity

တနေ့သ၌ ကျွနု်ပ်သည် ညစာကို ဘယ်သို့သော စားသောက်ဆိုင်တွင် သွားစားရပါ့ဟူသည့် အတွေးဝင်လာလေ၏။ စားသောက်ဆိုင် ပရောဂျက်များလုပ်ပြီးနောက် ၎င်းတို့ထံမှ အခမဲ့ဦးဦးဖျားဖျားစားရခြင်း၊ လျှော့ဈေးဖြင့် စားရခြင်း အစရှိသော အခွင့်ထူးများ ရတတ်လေရာ တရံတခါ ဤသို့သော စိတ်ကူးများ ဝင်လာတတ်သော ကျွနု်ပ်ကို အသုံးကြမ်းရုံကောဟု အပြစ်တင် မစောသင့်။

ပထမဆုံး ခေါင်းထဲရောက်လာသည်ကား ကလပ်ကေးမှ ဂျပန်စားသောက်ဆိုင်ပင် ဖြစ်ပေတော့သည်တစ်မုံ့။ သို့သော် ယင်းဆိုင်သည် ဆူလွန်းလှ၏။ အနှီပါတီပွဲတို့ကို အကြောင်းရှာ ကျင်းပလေ့ရှိကြသော သိုးဆောင်းသားတို့ ကျက်စားရာ ဖြစ်ပေကုန်၏။ သို့သော အတွေး ဝင်လာသည်နှင့် ထိုစားသောက်ဆိုင်ကို အတွေးစာရင်းမှ ဖျက်မိလေ၏။

Tomo Outside Night

Tomo Outside Night

Tomo Inside2

နောက်တစ်ဆိုင်သည်ကား ယင်း၏ လက်ခွဲဖြစ်ပေထသော ဒူးရင်းသီး အဆောက်အအုံကြီးနား၊ ခွေးခြင်္သေ့ ရုပ်တုကြီးနားမှ ဆိုင်ပင် ဖြစ်ပေ၏။ သို့သော် အကင်စာများကို ကျွနု်ပ်ကား ငြီးငွေ့လှပြီ။ အခြားဆိုင်များသို့သာ ခြေဦးလှည့်တော့အံ့။

Tomo Esplande

Tomo Esplande

နောက်တစ်ဆိုင်သည်ကား ကျွနု်ပ်၏ အကြိုက်ဖြစ်သော ယိုးဒယားစာ၊ သင်္ဘောသီးသုပ်တို့ ဖွယ်ဖွယ်ရာရာ စားသုံးနိုင်သော ထိုင်းဆိုင်ပင်ြဖစ်ပေတော့၏။ သို့သော် ဆိုင်ရှင်ဖြစ်သူ၏ ဖုန်းကညာတစ်ပါး မျက်နှာကို ပြေးမြင်မိသည်နှင့် ထိုအကြံအစည်ကို ဖျက်လိုက်ရပြန်လေတော့သည်။

Thai Restaurant

Thai Restaurant

နောက်တစ်ဆိုင်သည်ကား ဆန်တိုးစား အမည်ရှိ ကျွန်းငယ်တွင် ဖွင့်လှစ်ထားသော အိန္ဒိယ အစားအသောက်ဆိုင်ပင် ဖြစ်ပေသည်။ သို့သော် ချပါတီတစ်ချပ်အတွက် သွားရမည့်ခရီးနှင့် ယခုရက်ပိုင်း မခိုင်လှသော ဝမ်းကို စဉ်းစားမိသည်နှင့် ထိုအကြံကို ဆလံပြလိုက်ရပေတော့သည်။

Indian Restaurant One

Indian Restaurant One

Indian Restaurant Sentosa 1

Indian Restaurant Sentosa 1

Indian Restaurant Sentosa 2

Indian Restaurant Sentosa 2

နောက်နေရာတစ်ခုကား ဟော်လန်းရွာ အမည်ရှိ စားသောက်ဆိုင်များ ချည်းသာ ဖွင့်လှစ်ထားသော နေရာဖြစ်တော့၏။ ထိုနေရာရှိ ကိုရီးယားစားသောက်ဆိုင်ကား အပြောင်းအလဲတစ်ခု ဖြစ်လောက်ငြား၏ဟု တွေးမိရကား ယခုပင်ထသွားရန် အင်္ကျီကောက်စွပ်၏။ သို့သော် ဘုစုခရုမှ အစပြု၍ အရွယ်သုံးပါးသော လူတို့သည် ထိုနေရာတွင် ကြက်ပျံမကျလောက်အောင် ကြိတ်ကြိတ်တိုးနေရကား မသိသူတို့မှာ စင်္ကာပူဟူသည် အစားသောင်းကျန်းသူတို့သာ နေသော အရပ်ပါကလားဟု ထင်မှတ်ရသော နေရာ ဖြစ်ပေသည်ကို တွေးမိရကား စိတ်ညစ်ညူးလှသည်နှင့် အင်္ကျီကို ပြန်ချွတ်၏။

Korean Restaurant 1

Korean Restaurant 1

Korean Restaurant 2

Korean Restaurant 2

အနှီနေရာတို့ကို ရှောင်ကွင်းစဉ်းစားသော် ခေါင်းထဲဝင်လာသည်ကား ဘောကျော်တို့ထွက်ရာ ဘရာဇီးဒေသ အစားအစာတို့ကို သုံးဆောင်ရန် ဖြစ်၏။ သို့သော် ယင်းမှာ ဆောက်လက်စဖြစ်၍ လွှစာမှုန့်သာ စားရန် ရှိတော့၏။

Brazil Restaurant One

Brazil Restaurant One

Brazil Restaurant Two 1

Brazil Restaurant Two 1

Brazil Restaurant Two 2

Brazil Restaurant Two 2

နောက်ဆုံးမတော့ ကျွနု်ပ်သည် ကြက်ဥတစ်လုံး ကောက်ကြော်ကာ ငါးပိရည်နှင့် မြန်မာဆန်ဆန် ကုန်းတုပ်လိုက်ရလေတော့သတည်း။

Ivy Generator

မိမိရဲ့ 3D Scene အတွက် ရှုပ်ထွေးပွေလီတဲ့ နွယ်ပင်နွယ်ခက်တွေ လိုချင်ပါသလား။ Ivy Generator ဆိုတဲ့ Open Source Software ပေါက်စလေးရှိကြောင်း လက်တို့လိုက်ပါရစေ။

သူ့ရဲ့ရည်ရွယ်ရင်းက သဘာဝကျကျရှုပ်ရှက်ခတ်နေတဲ့ နွယ်ပင်တွေ ကျပန်းထုတ်လုပ်ပေးဖို့ဖြစ်တယ်။ သူ့ရဲ့အရွက်တွေဟာ လေးထောင့်ပြား Square Plane ဖြစ်တဲ့အတွက် Alpha Channel ပါတဲ့ ဘယ် Texture မဆို သုံးလို့ရတယ်။ သူ့ Software လေးထဲမှာ နွယ်ပင်တွေပေါက်လာတာ ကြည့်ရတာနဲ့တင် စမ်းကြည့်ရကျိုးနပ်တယ်လို့ ပြောရမယ်။

သူ့ရဲ့ Export Import Format က obj နဲ့ mtl ဖြစ်တယ်။ နွယ်ပင်တွေအများကြီးဖြစ်သွားရင်တော့ Import မှာ တော်တော်နှေးလိမ့်မယ်။ V-ray သမားတွေဆိုရင်တော့ Scene ပေါ့စေဖို့ V-ray Proxy သုံးဖို့ လိုပါလိမ့်မယ်။

ဒါကတော့ Botanic Garden ကားပါကင်က စားသောက်ဆိုင်ရဲ့ အောက်ဒိုး Scene တွေထဲက တစ်ခုဖြစ်တယ်။ Botanic Garden ဘက် နံရံပေါ်က နွယ်တွေကို Ivy Generator နဲ့ ထုတ်ထားတာဖြစ်တယ်။ Render မြန်အောင် Anti-aliasing ပိတ်ထားတဲ့အတွက် ပုံက အနီးကပ်ကြည့်ရင် Pixel ထောင့်တွေထနေတာ တွေ့ရလိမ့်မယ်။

Botanic Garden Ivy

Botanic Garden Ivy

HDB Living Room

ကိုမောင်ဆန်း ဝေမျှတာကြည့်ပြီး…ကျွန်တော်လဲ တတ်သလောက်ဝေမျှတာပါ… အခုလုပ်ထားတာလေးက autocad ထဲမှာ 2d ကို plan နဲ့ elevation တွေ အကုန်ဆွဲ..ပြီးတာနဲ့ max ထဲကနေ import နဲ့ ခေါ်ထည့်ပြီး….max ထဲမှာ အဲဒီ 2d တွေကို snap ကောက်ပြီး.. အတိအကျ model ဆောက် ..နောက် vray နဲ့ material တွေကပ် ..render ချထားတာပါ.. ဒါ HDB flat တစ်ခု အတွက် လုပ်ပေးထားတာပါ…ကန့်သတ်ချက်တွေကြားထဲက ရသမျှကောင်း အောင်ကြိုးစားရပါတယ်….ဒီပုံမှာ..အဓိကက lighting ပါ…မနက် စောစောနေရောင်နဲ့ ..ညကထွန်းခဲ့လို့ မပိတ်ရသေးတဲ့ artificial lights တွေ နဲ့ ချိန်ပြီး လုပ်ထားတာပါ…..ပြီးမှ photoediting အနေနဲ့ Picasa ထဲမှာ ..Glow , B&W effect လေးထည့်ထားတာပါ…

Glow living room

Glow living room

Demo Reel

၂၀ဝ၁ ကနေ ၂၀ဝ၉ ထိ လုပ်ထားတဲ့ အလုပ်တွေကို အကျဉ်းချုပ် ပြနိုင်အောင်၊ ပြရအောင် အရင်က clip တွေ Render တွေထုက ကောင်းနိုးရာရာလေးတွေ ဖြတ်ပြီး ဒီဗီဒီယိုကို လုပ်တယ်။

One of my demo reel videos. I used to use it to show off my creations. But after a while, I began to understand that I need to learn a lot more. The world is really wide and I am still just a small fry:)…

Demoreel from Lionslayer on Vimeo.

Proudly powered by WordPress
Theme: Esquire by Matthew Buchanan.