A Very First Myanmar 3D Animation


Warning: Missing argument 2 for wpdb::prepare(), called in /home/yoeyar/blog.yoeyar.com/wp-content/plugins/nextgen-gallery/lib/tags.php on line 318 and defined in /home/yoeyar/blog.yoeyar.com/wp-includes/wp-db.php on line 1222

ကျွန်တော် 3DsMax စသုံးတော့ မှတ်မိသေးတယ် ကျနော့် ကွန်ပျူတာက Celeron 566, 128 MB RAM, On-board VGA ။ နောက်တော့ 64MB RAM တစ်ကဒ်ဝယ်ပြီး ထပ်စိုက်လိုက်တော့ 196MB ဖြစ်သွားရော။

2001 မတ်လ ထင်ပါရဲ့။ တပ်မတော်ခန်းမမှာ ကွန်ပျူတာပြပွဲလုပ်တော့ ပရော်ဖက်ဆာအဖွဲ့က သူတို့ကိုယ်တိုင် သရုပ်ဆောင် 3D လုပ်ထားတဲ့ Clip လေးပြနေတာ တွေ့တယ်။ စိတ်ထဲမှာ သူတို့လုပ်နိုင်ရင် ငါလည်း လုပ်နိုင်ရမယ်ဆိုပြီးတော့ ဖြစ်လာတာပဲ။ ခါချဉ်ကောင် မာန်ကြီးပေမယ့် ခက်တာက ကွန်ပျူတာတစ်လုံးဝယ်ဖို့တောင် ငွေကြေး အင်အား မရှိဘူး ဖြစ်နေတယ်။

နောက်ဆုံးတော့ စိတ်ကို ဒုံးဒုံးချလိုက်ပြီး ပါပါမဆုံးခင် ဘဏ်ထဲမှာ စုပေးထားတဲ့ မုန့်ဖိုးငွေလေးနှစ်သိန်းခွဲကို ကျစ်ကျစ်ပါအောင်ဆုပ်ပြီး ကျနော့်ဘဝရဲ့ ပထမဆုံး ကွန်ပျူတာလေးတစ်လုံးကို အရဲစွန့် ဝယ်လိုက်ပါတော့တယ်။

အဲဒီတုန်းက ကွန်ပျူတာဂရပ်ဖစ် အန်နီမေးရှင်းနဲ့ ပတ်သက်ပြီး သင်တန်းဖြစ်ဖြစ်မြောက်မြောက်ဆိုလို့ Forever Group တစ်ခုပဲ ရှိတာ။ မှတ်မိသလောက် သင်တန်းက Level ၃ခု ရှိတယ်ထင်တယ်။ Level တစ်ခုကို သင်တန်းကြေး ၂ သိန်းခွဲဆိုတော့ နေရစ်တော့ မြနှင်းရယ်ပေါ့။ စသုံးတော့ 3DsMax Version က 3.1 ။ အဲဒီတုန်းက ဒီခေတ်လို Ebook မြောက်မြောက်များများ လောက်လောက်လားလား မရှိသေးတော့ Software မှာပါတဲ့ Help File လေးကို ဖတ်ကာဖတ်ကာနဲ့ စမ်းတဝါးဝါး လုပ်ခဲ့ရတယ်။ ၈တန်းဆရာမ၊ ၉တန်းဆရာနဲ့ ဆရာဦးမြကြိုင်တို့ကို ကျနော့်ရဲ့ အင်္ဂလိပ်စာအရည်အချင်း အိုးနင်းခွက်နင်းဘဝကနေ ထမင်းစားရေသောက် မတောက်တခေါက်ဘဝထိရောက်အောင် သင်ပေးခဲ့ကြတဲ့အတွက် ကျေးဇူးတင်ပါတယ် ဆရာတို့။

အဲဒီတုန်းက ကွန်ပျူတာများ တစ်ခုခုဖြစ်ပြီဆို မလုပ်တတ်မကိုင်တတ်နဲ့ ကွန်ပျူတာဝယ်ခဲ့တဲ့ သိမ်ဖြူကို ပြေးပြေးပြရတာ အလုပ်တစ်လုပ်။ ခြောက်လလောက် ရမ်းသမ်းစမ်းသပ်ပြီးတဲ့နောက်မှာ သုံးမိနစ်စာ Animation လေးတစ်ခုကို စ လုပ်နိုင်ခဲ့တယ်။ အဲဒီတုန်းက ဗီဒီယို အော်ဒီယိုပိုင်းနဲ့ ပတ်သက်ပြီး ဘာမှအတွေ့အကြုံမရှိသေးတဲ့အတွက်ကြောင့် အားနည်းချက်များစွာနဲ့ပေမယ့် တော်တော်လေး အားရခဲ့တာ အမှန်ပါပဲ။

2001 နှစ်ကုန်ပိုင်း UFL စတက်တဲ့ အချိန်မှာပဲ အဲဒီ Animation လေးကို အပြီးသတ်နိုင်ခဲ့တယ်။ အဲဒါလေးကို တစ်နေရာရာမှာ ပြချင်တဲ့ စိတ်အား ထက်သန်မှုကလည်း အပြည့်။ အဲဒီတုန်းက ကျောင်းသားစုံညီပွဲလုပ်မယ်၊ ကျောင်းသားတွေရဲ့ လက်ရာကို ပြသနိုင်တယ်၊ တက္ကသိုလ်ကျောင်းတွေလည်း ပါဝင်နိုင်တယ်ဆိုလို့ မော်ကွန်းထိန်းကို အရဲကိုး မာန်တင်းပြီး သွားဆက်သွယ်ခဲ့ပါတယ်။ သူ့ဆီက စကားပြန်ကလည်း အားတက်စရာပါပဲ။ နေ့နေ့ညည မျှော်လင့်ချက်တွေနဲ့ အဲဒီနေ့လေးကို စောင့်ခဲ့ပေမယ့် နောက်ဆုံးမှာ ဘကြီးအောင်က ညာခဲ့တာပါပဲ။ ဘာပဲဖြစ်ဖြစ် ကျနော့်ရဲ့ ဆုံးဖြတ်ချက်တွေကို ပိုပြတ်သားအောင် အကူအညီပေးခဲ့တဲ့အတွက် ကျေးဇူးတင်ပါတယ်ဆရာ။

ကျောင်းသားစုံညီပွဲမှာ ပြမယ်ဆိုတဲ့ စိတ်ကူး ပျက်ပြယ်သွားပြီးတဲ့နောက်မှာ စိတ်ထဲမှာ တစ်ကိုယ်လုံးခွန်အားမရှိတော့သလို ခံစားခဲ့ရတယ်။ ဒါပေမယ့် အဲဒီအချိန်မှာ အိပ်မက်တွေ စိတ်ကူးတွေနဲ့ မွှန်ထူနေတဲ့ ကျွန်တော် ဘာလုပ်တယ် ထင်ပါသလဲ။ ကျွန်တော့်ရဲ့ Animation လေးကို CD တစ်ချပ်ထဲထည့် စာတစ်စောင်ကောက်ရေးပြီး စာတိုက်ကိုသွားပါတယ်။ စာတိုက်က CD တွေက စာတိုက်ကြီးက Register လုပ်ပြီးမှ ပို့လို့ရတယ်ဆိုလို့ စာတိုက်ကြီးကို ထပ်သွားပြီးမှ ပို့လိုက်ရပြန်ပါတယ်။

ကျွန်တော်ပို့တဲ့လိပ်စာက “ညွှန်ကြားရေးမှုး၊ မြန်မာ့ရုပ်မြင်သံကြား၊ ပြည်လမ်း၊ ရန်ကုန်မြို့” အကြောင်းအရာက ” CD တွင်ပါရှိသော Animation ကို မြန်မာ့ရုပ်မြင်သံကြားမှ လွှင့်ပေးပါရန်” ။ ဟားဟား အဲဒီတုန်းက စိတ်ဓာတ်မျိုး တစ်ဝက်လောက် အခု ပြန်လိုချင်လိုက်တာ။ ရူးရူးမိုက်မိုက် တုံးတိုက်တိုက် ကျားကိုက်ကိုက် လုပ်ချင်ရာကို ဖြစ်အောင်လုပ်မယ်ဆိုတဲ့ အလျှံညီးညီးတောက်နေတဲ့ စိတ်ဓာတ်မျိုး။

ဒီဇင်ဘာ လကုန်ခါနီးထိ ဘာမှ စကားပြန်မရတဲ့အတွက် နောက်တစ်ခု ထပ်ကြိုးစားဖို့ ဆုံးဖြတ်လိုက်တယ်။ အဲဒီတုန်းက Animation တွေ အရှိန်အဟုန်နဲ့ ထုတ်ဖို့ကြိုးစားနေတဲ့ company တစ်ခု ရှိတယ်။ El`dorado တဲ့။ လူ့ခွစာ ကျွန်တော် ဘာလုပ်တယ် မှတ်ပါသလဲ။ အဲဒီကို ဖုန်းဆက်ပြီး ကျွန်တော် 3D Animation လုပ်နိုင်တယ်၊ အင်တာဗျူး လိုချင်ပါတယ်လို့ ပြောလိုက်တယ်။

ယုံချင်ယုံ မယုံချင်နေ။ အဲဒီကနေပဲ ကျနော့်ဘဝရဲ့ အလှည့်အပြောင်းတစ်ခု စခဲ့တယ်။ အဲဒီကပဲ လူတွေအများကြီးနဲ့ သိခဲ့ ရင်းနှီးခဲ့တယ်။ အင်တာဗျူးတဲ့နေ့မှာပဲ ကျနော့် Animation လေးဟာ 2002 ဇန်နဝါရီ ၉ ရက်မှာပဲ MRTV က လွှင့်မယ်ဆိုတာ သိခဲ့ရတယ်။ ဘယ်သူပဲဖြစ်ဖြစ် ကျနော့် Animation ကို လွှင့်ဖြစ်အောင် ကူညီပေးခဲ့တဲ့ လူတွေအားလုံးကို ကျေးဇူးတင်ပါတယ်။

အဲဒီ Animation လေးဟာ ကျနော့်ရဲ့ ပထမဆုံး Animation မက မြန်မာ့ ပထမဆုံး Short 3D Animation လည်း ဖြစ်ပါတယ်။

နာမည်က “ခဲတံလေးရဲ့ ည”။

Night of The Pencil from Lionslayer on Vimeo.

ဆက်စပ်ရာ Posts များ

3 thoughts on “A Very First Myanmar 3D Animation

  1. ကောင်းတယ်ဗျာ..ပထမဆုံးဆိုပေမယ့် idea လေးက ချစ်စရာ တော်တော်ကောင်းတယ်..
    အစ်ကို စိတ်ဓာတ်ကတော့ တော်တော့် ကိုထက်သန်တာပဲ…
    လေးစားပါတယ်..ဆက်ပြီးလဲ ကြည့်ချင်ပါသေးတယ်…

  2. Pingback: YoeYar CG Blog » Blog Archive » 3D Designer ကိုမောင်မောင်ဆန်း နှင့် တွေ့ဆုံခြင်း

Leave a Reply

Your email address will not be published. Required fields are marked *


*

Proudly powered by WordPress
Theme: Esquire by Matthew Buchanan.